指「三表三品」批核粗糙

話說佢幫中行呢啲超級大型國有銀行呻苦，話要啲大銀行去谷中小企貸款真係好為難㗎，因為成本同做一單大型企業嘅生意一樣。佢直腸直肚咁舉例批評，話內地好似溫州呢啲中小企密集嘅地方，竟然用「三表三品」去決定做唔做一單中小企貸款生意，真係太過粗糙。

梁大律師解釋，所謂「三表」係指電錶、水錶、報關表，「三品」係指老細嘅人品、產品同埋抵押品。絲絲醒起兩個月前已經聽過呢個咁有中國特色嘅潮語喇，咪就係劉明康最近考察某地方銀行時，見到有銀行用呢啲做指標，就公開盛讚、推介一番囉！

內地依家仲未有可靠嘅中小企信用資料庫，惟有暫時用住呢啲咁原始嘅方法，都係無辦法中嘅辦法，梁律師只係想提點內地銀行早啲用現代化嘅方法做生意啫！

余絲韻