強調工作與生活平衡嘅滙豐同恒生銀行（00011）又有新搞作，朋友同絲絲講，話滙豐員工同管理層反映完意見之後，推出咗新政策，分別係彈性返工時間同埋喺屋企返工，恒生員工仲可以早啲返屋企做節添。
一周兩日可屋企工作
絲絲打聽完詳情，知道彈性返工時間即係只要員工返足每日鐘數，返工同放工時間就自己決定；至於喺屋企返工，顧名思義就係連公司都唔使返，喺屋企搞掂晒啲嘢就得，不過就限住一個星期最多兩日。至於恒生員工，喺大時大節返工時間都會比較彈性，可以早啲返屋企做節，做夠一定鐘數嘅義工仲可以放多日假添。
嘉獎義工服務老臣子
有唔少企業唔敢推出呢啲措施，驚員工會偷懶，不過絲絲相信滙豐今次推行新政真係信心十足，因為佢哋員工做義工都做唔少，偷懶機會一定唔大。根據統計，滙豐搞咗好多年嘅「學生營商體驗計劃」，佢哋嘅義工時數已經超過2.7萬小時。
為表揚員工喺返工以外仲咁勤力做義工，滙豐銀行亞太區主席鄭海泉及該行執行董事王冬勝親自頒發長期服務獎畀參與營商計劃嘅老臣子。絲絲見到有員工已做咗5年義工，呢個「老人獎」真當之無愧，據聞呢位員工來自人事部，已經幫5間中學同110個學生完成營商之旅。絲絲覺得佢繼續努力，一定會「桃李滿天下」。
余絲韻