本文重點
內地經濟數據嘅可信性經常受外界質疑，尤其係今年以嚟，作為工業生產指標之一嘅發電量持續負增長，經濟增速及工業增加值就反而有見底回升迹象，多次成為外資投行質疑嘅對象。連身為前電監會副主席嘅邵秉仁最近都忍唔住話，地方政府上報嘅經濟數據真實性確實值得懷疑。
電監前高官都質疑
身為電力監管部門嘅前高官，邵秉仁好相信用電量同運輸量數字做唔到假，所以佢喺今年三月之後，專門針對數據互相矛盾嘅現象，去兩個省份親自調查，結論就係「地方上報嘅數據不實」。事關其中一個省份首季水泥等建材用電量下跌，當地政府竟然話自己經濟增長咗超過一成，仲要係因為災後重建拉動經濟增長，又的確難以令人信服。
之不過，國家統計局早前先針對呢個問題，專門寫咗篇文章作出解釋，結論當然係內地數據絕對可信，外界對數據互相矛盾嘅質疑唔夠科學啦。今次邵生咁快人快語，直接點出數據嘅問題之處，唔知係咪同佢已經脫離電監會嘅官方身份有關呢？
余絲韻