本文重點
緣分係好奇妙嘅，有緣嘅話無論距離幾遠都會再重遇，相信恒生銀行（00011）副董事長兼行政總裁梁高美懿最近都深深體會到。佢上周第一次落區視察環境，就返到佢開人生第一個儲蓄戶口嘅跑馬地恒生分行，仲見番個好耐無見嘅客戶，呢啲咪就係緣分囉！
重遊第一次開戶分行
梁太當日被安排到跑馬地、銅鑼灣、北角、西灣河5間唔同年代嘅分行視察，去到跑馬地分行特別感觸良多，因為佢第一個儲蓄戶口就喺呢度開嘅。想當年跑馬地分行設計沿用銅門，銀行嘅徽號仲係古錢同金屬車轆圖案，梁太自己都話，發夢都估唔到今日會舊地重遊，而且身份更由當年一個開戶口嘅細路女，變成銀行嘅CEO。
最令梁太高興嘅係，佢撞番一個好耐無見嘅客人，呢位客人開戶超過廿年，同分行好多同事都好熟，所以一入嚟就好多人都認得佢。最驚喜就係佢哋兩個都認得大家，梁太仲即刻約佢下次見面！
點解絲絲知道得咁清楚？當然啦，因為梁太將呢個咁興奮嘅重遇經歷，寫咗喺佢個CEO Blog嗰度同大家分享。加入咗恒生約一個月，梁太已經當班同事係朋友咁，寫Blog同佢哋講心事，相信恒生上下都一定融洽非常！
余絲韻