本文重點
每逢有大型新盤入伙在即，都會有大量租盤在市場推出預租，由於供應較多，當中會搵到不少「筍盤」，Vincent聽代理老友講，將於今個月入伙嘅將軍澳首都，市場累積嘅放租盤已經有300個，近日仲啱啱錄得首宗租賃成交，單位係5座右翼高層A室，獲原租住港島區嘅專業人士承租，月租1.1萬元，呎租約11.5元，比同區平均呎租15元低超過兩成。
中原黃田偉話，上述單位面積958方呎，屬三房連套房加多用途房間隔，雖然有海景，但因現時屋苑嘅放租單位有唔少係三房戶，所以租金就叫唔起，整體平均呎租叫價只係12元。
另外美聯林振聲話，近日首都嘅轉手蝕讓金額逐步收窄，右翼高層D室以430萬元賣出，比舊年三月買入價只蝕約一成。
金寶大廈變創意工廈
唔少發展商積極籌劃黃竹坑工廈嘅變身大計，不過因時機未成熟，故有發展商就趁空檔期，為物業注入新點子。嘉華國際（00173）嘅業發街1號金寶大廈，近期請來意大利插畫及漫畫家Mauro Marchesi，以其創作嘅故事人物Hollywood Bau為主題，在整幢物業嘅公共空間加入手繪漫畫，變成為創意工廈，仲改咗名叫THE FACTORY，租客會針對從事藝術、電影製作、文化及設計界人士。
（Vincent Lau）