本文重點
中國電力（02380）「女電王」李小琳喺香港有唔少「粉絲」，小琳上次全年業績會因為畀總公司「急Call」返北京開會而同香港傳媒緣慳一面，點知一大班諗住尋日中國電力股東周年大會補番數嘅傳媒再一次撲個空，甚至有一班諗住見唔到小琳又分唔到茶點嘅小股東鼓譟，認真尷尬！
小琳不嬲錫住香港傳媒，上次因突然畀人急召返京開會缺席業績會，所以尋日一班傳媒同小股東晨咁早去到股東會發現又一次見唔到小琳芳蹤，自不然有啲唔高興，不過，絲絲聽老友講小琳原本都好想嚟香港見吓股東同傳媒，但近排喺北京公務又實在繁忙，所以最後都抽唔到時間囉。
股東會茶點唔夠分
或者係見唔到小琳，尋日唔少小股東都索性「化悲憤為食欲」，搞到股東會會場入面出現咗條排隊拎茶點嘅人龍，有啲鬼馬嘅小股東仲排完就食，食完再排，搞到佢哋爭啲因為食物唔夠分而鼓譟，好彩工作人員「執生」安撫掂班小股東先無事咋！
余絲韻