本文重點
講起豬流感（H1N1甲型流感），相信大家亦唔會唔記得○三年嘅沙士，但令人覺得更邪嘅係，沙士同豬流感嘅香港首宗個案都同中旅國際（00308）有莫大淵源，事關兩次都發生喺中旅旗下嘅酒店。早排豬流感首宗發現個案就喺中旅旗下灣仔維景酒店，政府將酒店內嘅住客同員工隔離咗7日，家陣事過境遷，酒店已經重開，中旅主席張學武話佢哋不知幾開心，啲員工同住客都無事之餘，事件反而變相為公司賣廣告，令好多人都識維景。
中旅執行董事許慕韓話，佢哋喺維景酒店被隔離嘅員工有成百幾人，啲員工無客人咁好，要成4至5個人逼埋喺一間房度瞓，都捱得好辛苦，所以酒店解封後，公司即刻發放咗幾十萬元嘅補貼畀員工，其中30位表現突出嘅員工仲額外有大利是添。
抗疫客人都有優惠
唔單只咁，公司仲畀咗額外假期同時請佢哋去旗下嘅旅遊景區旅行散吓心。佢仲話，公司同酒店隔離嗰批客一齊度過咗艱難時期，有好深厚嘅友情，梗係亦唔例外咁畀咗好多優惠啲客啦，希望啲客都會再嚟幫襯敍吓舊都好。中旅真係識做生意，唔怪得成為咗國家重點培養嘅旅遊業旗艦啦。
余絲韻