本文重點
中移（00941）以Google Android平台大搞OPhones對撼蘋果iPhone嘅消息，之前已廣受談論，但原來OPhones生產商之間嘅角力戰一樣非常激烈，台灣宏達（HTC）執行長周永明尋日就高調表示，公司將於下月推出中移版嘅MAGIC手機，大有要搶奪原被視為「OPhones第一機」嘅聯想O1頭啖湯之勢。
宏達推MAGIC挑戰聯想
以Google Android平台所開發嘅手機至今仍被唔少人誤稱為「GPhone」，而HTC嘅「G1」則係世上首部Android手機，新登陸本港嘅HTC Magic屬該系列最新型號。周永明接受《華爾街日報》訪問時就話，公司下月會透過旗下嘅「多普達」品牌與中移合作，在內地推出用於2.75G EDGE網絡嘅Magic手機，手機定價初步為5,000元人民幣；報道更形容「該機將為首款在內地推出嘅Android手機」，至於中移TD 3G嘅型號則會於稍後推出。周永明仲表明除咗搶先與中移合作外，HTC亦準備與聯通（00762）及中電信（00728）合作在內地推出更多Android手機。
周永明喺國際報章高調披露HTC嘅中國Android戰略，實行向潛在最大對手聯想較技，事關喺中移嘅「OPhones」計劃曝光以來，大家一般都把目光放在由聯想與中移合作開發嘅O1身上，之前更有傳O1會喺本月正式上市，而以目前情況分析，「OPhones第一機」誰屬仍存在不少變數。
余絲韻