本文重點
新世界發展（00017）執行董事鄭志剛尋日出席「新世界眾力量2009舊衣新貌布藝雕塑創作展」嘅開幕禮，絲絲知道該活動係由新世界聯同多個社會企業攜手舉辦，目的係鼓勵青少年進行藝術創作，將啲舊衫褲設計成各種得意可愛嘅布藝動物雕塑，呢個活動除咗提倡青年藝術，仲要向大眾宣揚環保意識。
絲絲喺現場見到咁多得意嘅布公仔都嚇咗一跳，估唔到舊衫褲都可以轉化為咁靚嘅製成品。絲絲就好奇問吓鄭志剛平時有冇用啲舊衫褲做小設計，佢話有時都會剪爛啲舊衫褲當枱布用，或者用嚟裝飾吓T恤，真係別出心裁！
絲絲仲有問鄭志剛同未婚妻Jennifer選擇今年十一月結婚，係咪有乜嘢特別意思，佢就好風趣咁話自己都唔清楚點解會選擇十一月，可能係貪秋天夠涼爽咁話喎！
公司否認入股NBA騎士
另外，絲絲仲八到一段奇聞，竟然有消息話新世界有意入股美國NBA球隊克里夫蘭騎士！當地報道話，新世界集團出錢畀一名叫黃健華嘅人士支持佢入股騎士，佢仲有可能喺下個賽季擔任球隊嘅管理層。但新世界發言人已否認有關傳聞，話絕無此事。成件事真係匪夷所思！
余絲韻