港股昨日表現反覆，早段地產股撐起大市，恒指高見17,284點，不過幾隻重磅股滙控（00005）、中移（00941）跟中海油（00883）表現不濟，拖累港股午後倒跌，恒指更失守萬七關。期指今日結算，古晨相信港股或更波動，但炒鬼一於少理，炒股唔炒市，個別二三線股仔昨日繼續熱炒。
內地通脹未有惡化，國務院早已批准電企兩度上調電價，電力企業的盈利喺今年首季已有改善。華電國際（01071）上月底公布第一季利潤按年急升2.2倍至1.91億元人民幣，市場預期華電今年可成功扭虧為盈。
有消息話內地政府已介入電煤談判，相信好快會有結果，有助電力企業掃除不明朗因素。華電昨逆市升2.4%，成交亦見增加，睇樣在1.9至2元間整固已完成，走勢隨時見突破，呢個位上車，股價升破2.2元，有條件挑戰年內高位，止蝕定喺50日線，跌穿1.94元跳車。
古晨