大家唔好睇小over trade嘅影響，當你過度炒賣而招致虧損，尤其係畀個市連摑兩巴之後，要恢復入市信心絕對唔容易，因為你會懷疑自己可能睇錯市。好似Ivey咁，由於炒大咗，呢輪一路沽住隻鎊，但隻鎊係咁升，前日見佢回番去1.58六、七十都乘機平倉。尋日晏晝隻鎊先抽上1.5945，再急插穿1.59，轉勢訊號都幾明顯，但都唔敢沽。
我自己衰多手，見隻鎊破咗day high之後回番去1.59邊，博佢只係調整，守住1.59之後再上，所以就喺1.5908揸咗一手鎊。點知做咗「黑妹」，呢頭揸完，嗰頭已經隊穿1.59。望咗一陣見佢仲上唔番1.59，仲繼續跌，於是即刻喺1.5868沽咗，之後見佢跌到1.58十幾，大致收復失地，於是平咗倉。
後來見隻鎊好似升唔上，所以擺咗個限價盤喺1.5790，結果中咗，都唔知係唔係好事，我都唔敢太樂觀，於是只擺番個止蝕盤喺1.5820，雖然呢個唔係咩位，但沽鎊擺止蝕，隨時擺幾多蝕幾多，我都預咗佢中。
蘇小妹