本文重點
規劃署近年密密手在各區加入發展限制，以避免物業重建時出現一排又一排嘅屏風樓，早前已經加入高度及非建築地帶限制嘅港島筲箕灣區，引來地產建設商會嘅強烈反對，認為會影響重建潛力，要求全數取消，不過該署認為理據不足，所以未有認同，但在非建築地帶限制上就略為讓步，建議可加入申請輕微放寬嘅條款，城規會將會在今個星期五討論。
Vincent收到風，城規會就筲箕灣加設高限等接13份意見，反對意見主要來自地建會同房協，但放寬高度同地積比率限制嘅意見都未被接納，只有屬綜合發展區嘅明華大廈，在非建築地帶嘅限制可以有少少放寬。另該署早前由綠化地帶改劃堆填區的禾徑山部分用地，有一間公司原來揸住其中250個地段嘅地，被劃做堆填區當然大力反對，但卻反對無效，署方決定維持原判。
一太龍舟隊靚女做鼓手
明日係一年一度的端午節，又係Vincent睇龍舟嘅時間，一向積極參與龍舟賽嘅第一太平戴維斯，今年原來係第四年參加比賽，該公司老友話，今年會由商舖部董事暨零售代理主管梁力宏領隊，以「一太龍」名義出賽，派出隊員約40個，會分別參加男女混合組及男子乙組比賽，為壯士氣，兩隊鼓手都會由來自亞太區物業投資部嘅靚女擔任，加上過去三個月嘅艱苦訓練，相信屆時一定有出色表現。
（Vincent Lau）