踏入三月以來，恒指反反覆覆經已升咗近6,000點，上上落落，當中犧牲的熊仔熊女，相信真係不計其數。好似早前網上就有一班淡友，眼見恒指愈升愈有，因而聲言要集結起來與大行一戰。有網友表示，在○八年金融海嘯一役中，希望投資者記得的不僅是貝爾斯登，仲有呢班曾經奮勇做淡的海嘯熊仔黨！此外，當中亦有網友引用近日社會潮語「人生有幾個十年?」去形容做淡友的決心，且引來過千篇網民的回覆。
講到尾，市場注滿熱錢，買買賣賣都係真金白銀，所以股友們想做淡，絕對係一項艱難任務，實乃「非戰之罪」！計我話，縱使淡友心癢難奈，亦無謂對着幹。
講番大市，尋日恒指表現唔算標青，不過一眾本地地產股受樓盤大賣消息刺激，升勢如虹，以收市計，升得最多為信和置業（00083），升9.1%，收報12.82元，長實（00001）收報88.8元。另外，尋日再生能源股亦續有炒作，好似中國風電（00182）咁，就再升15.38%，總之都係一如先前所講，有勢就唔怕追。
（小尾）