本文重點
接替轉投恒生（00011）嘅梁高美懿，出任滙豐工商業務環球聯席主管嘅郭懷道，回歸前喺香港做咗差唔多廿年，闊別香港13年之後重返舊地，佢話感覺就好似返咗屋企咁，望番中環嘅景色已經完全唔同晒，起咗好多高樓大廈，例如近海嘅國際金融中心。
當年與大班「有偈傾」
郭懷道喺七七年加入滙豐，七八年嚟到香港，咁啱梁太就喺七八年加入滙豐，郭懷道話同梁太早已相識，佢仲回憶起當年一大班人嚟到香港嗰陣，同蒲偉士見面傾吓偈，年輕員工都可以同管理層見面。重回事業起步嘅地方，佢話感受好特別。
雖然依家滙豐已經係一間跨國銀行，呢一類型嘅面談係少咗，但都仍然有做。郭懷道話咁多年嚟香港都經歷過唔少危機，好似八三年貨幣危機佢仲歷歷在目，好清楚記得嗰時係落緊雨。
郭懷道依家睇晒中東同埋亞太區嘅工商業務，佢好快就會馬不停蹄去英國及印度，與同事就工商業務交流吓意見。
余絲韻