本文重點
三大中資電訊商上周公布四月份營運數據，上客明顯放慢咗，有分析員估計係季節性因素影響，但亦有人話係因為電訊商嘅宣傳放慢咗手腳，推出嘅優惠亦無咁多所致。咁又係，事關宣傳都應該有個預算，唔可以個個月都係咁科水宣傳，皆因要喺內地呢片神州大地賣廣告實在唔係嘢小。
黃金時段「三大」玩晒
隨着聯通（00762）喺本月十七日正式推出3G品牌「沃」，連埋中移（00941）嘅「G3」以及中電信（00728）嘅「天翼」，三個3G品牌喺內地開始有排鬥，尋日有報道就話，踏入五月以來，「天翼」、「G3」及「沃」嘅廣告幾乎霸晒中央電視台最昂貴嘅黃金時段廣告位，有熟悉內地廣告市場人士就話，要喺呢個黃金時段落廣告，每月大約要2,000萬人仔，簡單一計，一年就要2.4億人仔。報道仲話，「三大」唔單止喺央視賣廣告，喺全國各大城市嘅公交車身、街頭路牌、高檔社區電梯間及主流報紙同網站上都隨處可見「三大」嘅廣告。「三大」年底公布業績，廣告宣傳嘅開支應該好「可觀」。
余絲韻