本文重點
工行（01398）坐擁世界最賺錢銀行之名，尋日嘅股東會吸引咗唔少股東慕名而來，一睹全球前景最秀麗嘅銀行管理層風采，一共有1,300人逼爆四季酒店，唔知係咪估唔到小股東咁熱情，大會方面真係「招呼唔到」，一個大堂唔夠畀咁多股東坐，期間又出現唔少「打尖」、「嗌交」嘅場面，足足用咗半個鐘頭有多先將啲股東安頓好。
其實工行舊年嘅股東會已經有800人出席，不過今次更上一層樓，根據絲絲了解，唔少股東係第一次嚟，睇嚟真係有唔少散戶追咗貨。有位股東就話嚟到都係想拎張餅卡，收吓「特別股息」，不過工作人員話要等好耐，加上又無得入去親自見董事長姜建清一面，不如返去睇電視好過。
股東睇視像無晒癮
俗語所謂「三軍未發，糧草先行」，大會之後都安排一車一車（酒店行李車）嘅四季西餅運到，滿足小股東，等佢哋可以滿載而歸，有啲小股東仲大包細包咁拎走添。
不過亦有股東唔係為餅而來，有股東批評山長水遠嚟到，唔通貪你舊餅咩？無非都係想聽吓公司嘅發展情況，點知坐爆晒人，要去第二間房睇視像，當堂無晒癮。
余絲韻