港股昨日走勢反覆，早段內地股市因計劃重新啟動IPO而顯著下跌，拖累港股走軟。午後內地股市倒升，港股亦轉跌為升。古晨相信明日期貨結算前，港股都唔跌得去邊，加上美股昨日假期，好友更易為所欲為。不過，成交額縮水至588億元，反映炒鬼喺結算前唔多積極入場，寧願等結算完畢，有較清晰方向再作打算。
古晨今日睇住隻洛陽鉬業（03993），昨日曾下試10日線，但在市況回穩後，股價重拾升勢，報收4.96元，升3.1%。近日金價表現硬淨，商品價格亦乘勢而起，資源股受惠商品價格急升，亦跑贏大市。相對鋼鐵股，生產煉鋼鐵用原料之一的洛鉬相對落後，有機會炒上。
有色金屬企業去年面對成本急劇上漲，及商品價格大幅波動的影響，毛利率受壓，洛鉬去年的毛利率亦較上一年度下跌12.5%，但仍有48.9%，與同業比較，仍處偏高水平，值得睇高一線。
古晨