原來尋日係英國同美國假期，唔怪之得歐洲開市之後都係咁靜啦。朝早歐元同英鎊雖然再衝頂，但最高只係升到1.4044同1.5938，破唔到上星期五個高位，如果短期內冇再創新高，就會有大幅調整嘅風險。我見歐元兌美元喺歐洲開市後一路都上唔番1.40，而且持續喺1.39六十幾七十，距離個歐洲市初段做嘅day low唔係高好多，帳面head住幾點，沽住先啦。
北韓又玩核試，搞到YEN散咗。所以炒YEN都唔係乜都唔使理，北韓一放導彈或者玩核試，市場就會乘機沽YEN。不過，好明顯北韓只係向美國佬示威，同埋勒索番多少援助，尤其依家美國佬為救經濟周身唔得閒，邊度仲有時間花太多精神去處理北韓核問題，北韓仲唔乘機攞番個彩咩，應該唔會搞到好大鑊嘅。
呢輪美元係咁跌，真係玩死唔少炒美元好友，尤其炒慣短線嘅，如果一路逆市加碼揸美元，真係揸到膽怯，始終都係血肉之軀。美元雖然幫唔落，但歐洲亦唔好得去邊，匯率都係以周期性上落，你話呢輪美元係咁跌咩，唔好唔記得，隻鎊喺2.11跌落嚟㗎，歐元同個歷史高位仲差2,000幾點，近期嘅反彈雖然係急啲，但都唔算好誇張啫。既然英美冇市，一於抖番一日，第二日再搏殺過！
蘇小妹