本文重點
去年內地樓價跌唔停，直至近期住宅市嘅表現終見改善，仲量聯行大珠江三角洲研究部主管陳錦平同Vincent講，今年頭四個月，包括北京、上海、廣州同深圳四個主要城市嘅住宅銷售量，比去年同期升70%，在二月開始一線城市嘅住宅樓價亦反彈10%至15%，又認為上海住宅市已過咗最壞嘅時間。
陳錦平仲話，由於內地一線城市嘅地產投資者普遍係實力派，加上供應量少，預期今年下半年至明年，內地住宅樓價升勢會集中喺北京同上海等一線城市。
另同系北京董事總經理張瑩話，內地政府批准保險公司直接投資地產的細則將會喺十月份出台，料北京保險公司將會把3%至5%嘅保費投資於房地產市場，涉及金額約20億至50億美元。
地政總署加費影響微
講番香港，地政總署為收回成本，建議調高有關土地測量嘅7項服務收費，加幅由7.5%至8.2%，最受影響係測量師，好似註冊為認可土地測量師嘅收費，會由4,080元加到4,400元，而加幅最大係查土地界線，會由73元加到79元，加費後，預計每年收入可以增加約16萬元。測量師陳超國同Vincent講，有關收費在近幾年無調整過，相信都係跟通脹加，一般來講，在進行重建同地皮買賣時，都會查土地界線，不過有關支出只係小數目，影響唔大。
（Vincent Lau）