本文重點
銀行講開源節流，大家都會諗到加收費同裁員，市場人士話某本地大錢莊，以往對員工都好忍手，不過近期突然「公事公辦」，同其他行做法冇乜分別，好幾位同事已經「陣亡」，唔使再返工。
錢莊加快自然流失
話說大家要跑數時，如果個客唔止買一張單，銀行員工往往同啲熟客傾好，將啲單簽定先，到時候再呈上去，咁條數就較均勻，避免「三更窮五更富」嘅跑單生活。但依家本地錢莊突然「公事公辦」，查番啲客嘅詳情，發覺有啲客喺香港同外地嘅時間與簽單日子不符，咁就會處分同事，輕則扣咗張單嘅表現分數，重則係咁先。最特別係張單仍有效，錢莊錢就照賺，大不了搵個客補簽番。
市場人士講起都幾唏噓，因為錢莊都講到明新一年要揸得嚴啲，佢話係錢莊要加快「自然流失」，仲話依家幫客人填財務需要嘅問卷都特別小心，因為聽聞呢個程序，最易畀啲客同銀行搵位「抽秤」。
余絲韻