本文重點
依家係食腦時代，特別對科技公司嚟講，人才係最值錢資源。搜尋器巨企Google為防止人才流失及保住優質人才，運用其經常使用嘅工具演算法（Algorithm），作為分析旗下超過2萬名伙記，偵測邊啲員工有離職意願，及早做定留人策略，以免失掉良才影響公司發展。
演算法偵測保人才
所謂演算法係源自算術嘅代數計算方法，係運用一套規則去執行程序或解決問題，今次Google就透過抽取員工嘅年度報告、升級及薪酬歷史資料，再借助一條複雜嘅方程式，輸入方程式嘅資料仲包括員工調查和同級評價。
Google當然唔肯透露方程式嘅詳情，仲話個演算法係測試階段，但已成功搵到感覺不被重用嘅員工資料，而呢個正係有潛在離職意向員工嘅主要投訴。
有人力資源人士話，Google使用演算法有助深入員工腦袋，可能仲快過嗰位有潛在離意，但又將離意深潛喺腦內嘅伙記。
余絲韻