本文重點
中信泰富（00267）炒燶外匯Accumulator一事，雖然商罪科及證監會仍在調查當中，但隨着前主席榮智健及董事總經理范鴻齡雙雙下台，事件擾攘暫時告一段落。絲絲某日翻開港交所（00388）最新年度嘅年報，年報顯示曾經係港交所董事嘅范鴻齡，○八年度董事袍金為30萬元；絲絲記得，港交所董事年前曾加過人工，董事每年袍金為30萬元，如出任常務委員會、稽核委員會、薪酬委員會及投資顧問委員會主席同成員，可每一委員會另加5萬元袍金。
由於范鴻齡係大忙人，更加係「公職王」，曾經係強積金主席等，所以○八年度佢並無出任上述委員會職位，換言之佢喺港交所一年嘅袍金係30萬元。
十月休假 照
一年人工
但心水清嘅朋友應該唔會忘記，去年十月中信泰富事件曝光後，佢喺十月二十二日已向港交所提出休假通知，暫停出席港交所董事會及提名委員會嘅會議，因為要避免喺監管機構調查中信泰富時令人覺得存有或可能有潛在利益衝突。因此佢去年雖曾休假，但仍攞足一年董事袍金30萬元。
其實30萬元係好少、好少嘅數目，對做咗多年中信泰富大班嘅佢，更加係雞毛蒜皮，可能少到連佢自己都忘記咗呢筆袍金！
余絲韻