港股連彈三個交易日後回吐，不過壓力唔算大，恒指報收17,475點，跌68點，成交維持暢旺。個別板塊繼續熱炒，尋日輪到電器股，相關股份閒閒哋升超過一成。古晨都係嗰句，炒股唔炒市，總之個市銀彈充足，乜股都可以炒鑊甘。
高盛啱啱調高咗今年石油平均價，亦順手調高埋油股目標價及評級，尋日細價石油股南海石油（00076）亦開車，升6.7%，走勢出現突破。雖然古晨對南海業績不敢恭維，上月底宣布去年全年虧損擴大至9,830萬美元，一年所蝕仲大過市值，咪話唔誇張。
不過，記得此股在○七年大牛市時候，市值曾見過百億元，依家縮龍成寸，得番唔夠十分之一。南海是龍是蟲，古晨唔多關心，不過仙班股當炒，南海呢個價炒高多一倍，市值亦唔過13億元，仲係較高位有段巨大距離。古晨見有勢跟炒，跌穿5.8仙就跳車鬆人。
古晨