前日隻鎊突破1.54之後，一路都落唔返去，最低都只係見過1.54廿幾，但之後好快挾番上去，之後反反覆覆，如果短炒嘅話，都應該可以執到唔少。不過我就無再入市，因為隻鎊喺紐約尾市升到上去1.55邊徘徊，我又唔想冒險過市，所以只係觀戰算數。
尋日朝一早收到Jenny個SMS，佢話前日執咗成千點。咁犀利，真係小妹都要企埋一邊。星爺套功夫電影有句對白好似係咁話：「天下武功，無堅不摧，惟快不破。」我就將佢改咗此少，贈畀Jenny。就係：「外匯市場，無招必贏，惟快必勝。」意思係講，炒匯一定要夠快，唔單止要諗得快、反應快、決定快，止賺同止蝕一樣要快。
尋日隻鎊雖然搞成朝都破唔到1.55，下晝仲試過1.5450，但我見個低位咁齊，而且由前日下晝爆穿1.54之後，就喺1.5450至1.5500形成大型橫行區。既然見唔到佢回落去1.5350，出現咁嘅橫行區梗係是但爆一邊啦，我揀咗睇上，於是尋日下晝喺1.5472揸咗一手。果然，隻鎊突破1.55，之後守喺樓上徘徊，照咁睇應該好快會上1.57！
蘇小妹