本文重點
近排東九龍樓市跑贏大市，既有財團斥資逾億元收購全幢住宅舊樓，又有投資者購入整幢工廈，區內不少業主都唔執輸，即刻伺機加價。Vincent收到風，億京旗下銷情理想的九龍灣宏光道1號，計劃最快下周一劃一每方呎加價一百蚊，另資深投資者盧華的觀塘利寶時中心，都諗緊加價2%至3%，雖然兩項物業的加幅都係半成以內，但足以反映業主睇好後市，善價而沽。
有代理老友報料，宏光道1號最快下周一全線加價，至於點解每方呎加一張紅底，大家都估估吓，不過，有口痕友話，近期唔少上市公司都重上「紅底股」價位，反映公司狀態大勇，所以連加價都跟風加一張「紅底」。依家宏光道1號累售差不多四成，加價後呎價近3,400元起。
利嘉閣捐贈舊獎盃
廢紙膠樽拎去回收就見得多，原來連獎盃都可以用嚟回收，Vincent八到，利嘉閣精英會近排搞咗個叫「獎盃捐贈計劃」嘅活動，仲喺短時間內就籌到近80個舊獎盃添，該會已經將全數獎盃捐晒畀將軍澳一間小學，用嚟舉辦各類比賽。
利嘉閣精英會會長趙保杰同Vincent講，呢個計劃一來可以表達公司對環保嘅重視，二來又可以藉以鼓勵一眾小精英奮發向上，激發佢哋努力不懈嘅精神。咁有意義，如果Vincent有獎盃都願意捐多幾隻啦！
（Vincent Lau）