本文重點
證券及期貨業職工會會長王國安上星期四聯同證券行行家，包括高信集團副主席藍國倫等，一行廿幾人一連四日到北京訪問，拜會咗多個機構，好似中證監、港澳辦等。
朱育誠：港滬有距離
講到依家金融界最關心嘅議題，當然係香港國際金融中心地位會否被上海取代，王國安會見國務院發展研究中心港澳研究所所長朱育誠時，都有提出呢個問題，朱育誠就大派定心丸，話大家唔使太擔心，指上海同香港仍有一大段距離，就算上海真係發展成熟，對香港嘅影響亦唔會太大，因為中國咁大，多一個金融中心有何不可？國務院發展研究中心港澳研究所喺內地好有地位，據聞研究報告可直達中央，所講嘅嘢其實有一定代表性㗎。
絲絲就覺得，雖然目前上海同香港真係仲有大段距離，但係人哋不斷壯大，若然香港原地踏步，結果係點唔使多講，香港業界同各位金融界高官真係要居安思危，好好諗清楚未來嘅發展方向及藍圖。
余絲韻