本文重點
呢期港股炒到慶合合，中資股高處不算高，好多二、三線股都交投活躍，唔少散戶樂見其成，湧入股仔之中尋寶，卜架生意好咗，自然笑逐顏開！
不過，一間卜架行嘅卜架尋日打嚟訴苦，話說呢間B組卜架行有唔少散戶捧場，由於近期股仔交投活躍，散戶多咗買賣，卜架多咗生意做，本來係好事，但前日呢間卜架行嘅網上股票交易系統居然「瓜機」，班卜架有生意但做唔到，自然勞氣，最慘前日大市成交僅六百幾億元，未及高峰期嘅一半，反映呢套系統極有需要作出改善。
客戶遲沽賺少一截
呢間行嘅另一位卜架就話，有炒股仔嘅客戶前日想沽貨獲利，偏偏遇上「瓜機」，結果尋日沽貨，利潤唔見一大截。更離譜嘅係，繼網上股票交易系統出問題後，尋日又輪到呢間卜架行嘅期指交易系統出問題，咁搞法真係「倒米」！
正所謂「小財唔出，大財唔入」，睇嚟呢間卜架行都要使啲錢，提升一下交易系統水平，免得股市再旺，「瓜機」事件頻生，咁樣同趕客冇分別！
余絲韻