本文重點
中移（00941）尋日開股東會，董事長王建宙除咗猛咁畀人問佢點睇入股遠傳電信單Deal嘅成數外，仲有一個老問題，就係王總佢老人家幾時退休。王總嘅回答當然都係嗰個指定答案，就係話每個人都需要退休，只不過佢退休唔係自己決定，所以無法話畀大家知佢幾時退休，但佢就應承大家，一知道就會第一時間通知各位。
逾5%反對連任董事
由於尚未落實退休，所以王總尋日都—如以往重選董事，根據投票表決結果顯示，有99.7%票數贊成王總連任董事，其他董事同獨董都獲大比數票數通過連任。唯獨副董事長張春江嘅連任表決，竟然有5.14%嘅票數反對，嗰度有成9億幾票㗎，絕對唔算細數目，就連中移公關都覺得有少少意外。絲絲估計，對於之前網通嘅小股東來講，張總就梗係廣為人熟悉，但自佢加盟中移以來，張總未曾到過香港見中移嘅小股東，所以尋日有9億幾票反對佢連任董事，絲絲都唔會覺得太出奇。
余絲韻