本文重點
滙控（00005）完成供股後首次喺香港開非正式股東會，集團行政總裁紀勤專登飛嚟香港主持，佢一開始發言時不忘用廣東話講「多謝」，感激香港股東對滙控嘅支持。雖然滙控喺眾多金融機構中表現仍較出色，但一眾小股東並無昔日嘅歌功頌德，好多首先肯定咗滙控嘅優點，然後就紛紛批評「大笨象」近年嘅發展以及滙融問題等。
先讚後踩 紀勤忙拆招
有位股東就借勢投訴，話滙豐銀行有種電話服務侵犯私隱，希望有人可聯絡佢傾吓點樣改進，紀勤即時話相信執行董事王冬勝同埋佢嘅同事好快會同佢聯絡。喺股東會投訴真係萬試萬靈，連大老細都要親自出馬添。
當然亦有股東對滙控好有信心，不過讚咗一輪之後就開始「發功」，話滙豐可能因為政治壓力，所以之前將總部搬咗去英國，但喺依家咁嘅情況下，好應該搬返嚟香港，應對番香港上海滙豐銀行呢個名，始終屋企最好，應該返去媽媽身邊，而且如果唔好好把握中國經濟起飛呢個機會，遲少少又盞後悔多次，好似後悔買咗滙融咁。
小股東仲對收購滙融、冇發盈警等好不滿。不過除咗投訴外，佢哋都有其他建議，就好似以股代息嘅時候，畀股東用折扣價買股，吸引多啲人以股代息；另亦有股東建議唔好一年派四次息，慳番啲行政費，但紀勤就話派息派得密，英國啲股東好鍾意喎。
余絲韻