隔晚美股做好，尋日再升521點，報收17,544點。大市升勢頗為全面，股仔繼續熱炒，古晨今日再吼仙班股，不過點都要提醒一句，炒到蚊型股，大市升浪已近尾聲，有乜唔對路，最緊要識跳車。
上周初永安旅遊（01189）曾炒起，高見5.5仙，跟住整固咗幾日，尋日走勢又喺成交激增下見突破，高見5.8仙，報收5.7仙，明顯又再砌過，可以跟番轉。
睇番永安業績確係麻麻，但勝在現金夠多，截至○八年底止，持有現金高達4.98億元，相當接近其約5.19億元市值。雖然豬流感唔多唔少打擊旅遊業，不過公司現金充裕，大可搞搞其他發展項目，古晨收到風，管理層已有計劃，準備再大展拳腳，難怪呢排股價有異動。永安另一吸引力，來自其每股NAV高達20仙，即使市價較NAV折讓一半，都要見番1粒神，尋日報收5.7仙，上望0.1元，止蝕位5仙。
古晨