我喺1.5248揸嘅一手鎊，前晚見佢破咗1.53之後雖然反覆，但倫敦收市後守番穩，我見去到點幾兩點隻鎊仲守住1.53，所以決定同佢過夜。尋日朝八點幾鐘起身，見隻鎊做過1.5347，十二點幾見過1.5355，心諗唔會咁快做咗頂，跟住喺歐洲市跌番落去啩？好彩隻鎊一路守住1.53。
下晝兩點幾鐘，隻鎊突然急升，上到1.54廿幾，英國CPI又未公布，心諗可能有人講嘢啩。後嚟先知係因為英國ICAP同瑪莎盈利好過預期，所以隻鎊挾咗上去。不過，喺唔知道發生咩事嘅情況下，我見隻鎊已經升到1.54四十幾，差唔多有200點執，於是決定食胡。
雖然後來隻鎊逼近1.55，但未破到，仲掉頭跌番去1.54五十幾，睇圖1.5350係主要支持，可以等佢回番去1.5350先揸番。隻鎊升番，姊妹Ivey就追番唔少失地，但另一個姊妹阿寶就唔知點解走咗去沽鎊，我都希望隻鎊跌番轉頭，但似乎走勢都係一路向上，要落番1.52都唔係容易！
蘇小妹