本文重點
樓市小陽春令各地產代理生意好咗，部分行決定向員工派錢以壯士氣，利嘉閣廖偉強同Vincent講，因為三、四月生意理想，所以後勤員工今個月可獲發相等於四分一個月人工嘅花紅，而今年後勤員工暫已收到相等於半個月人工嘅花紅，對打工仔嚟講確係好消息。
中原陳永傑亦話，會向全體後勤員工發放半個月人工做花紅，預計所需金額約二百萬元，而今年每名後勤已收到相等於四分之三個月人工做花紅，而今季起發放花紅金額會與盈利表現掛鈎。至於競爭對手美聯同香港置業，喺上月已率先向每名後勤發放花紅。
圓玄馬灣書室變博物館
充滿度假感嘅馬灣，自從區內馬灣公園開幕後，吸引唔少遊人去玩，嚟緊仲會有新旅遊設施落成，Vincent講緊係政府在今年初批出嘅芳園書室發展，係屬於「活化歷史建築伙伴計劃」嘅首批項目。負責嘅圓玄學院啱啱向城規會遞申請，將五幢兩層高、原屬鄉村式發展嘅書室，變身成馬灣水陸居民博物館，仲有旅遊中心及教育中心等，雖然樓面只得二千一百三十四方呎，但相信日後可以吸引去馬灣玩嘅遊人順道參觀。
（Vincent Lau）