尋日一開市，恒指經已跌穿17,000點水平，及後全日跌幅維持在400至600點之間，重災區當然係地產以及金融股，但全日跌得最多的仍然係港交所（00388），曾經一度跌見100.1元，及後跌幅收窄，最終收報102元。港交所總算能夠險守「紅底股」的身份。不過，另一隻藍籌股恒生銀行（00011）就冇咁好彩，開市冇耐就經已跌穿100元。
藍籌股表現麻麻，不過尋日一眾機械、生物股均見炒作，走勢唔錯。皆因內地就剛好通過「促進生物產業加快發展若干政策」，以及表示將投資628億元推動大型機械、生物產業等行業，怪唔之得早前相關股份都齊齊做好啦。諗真啲，消息才剛剛發布，都未來得及讓市場消化，話唔定今日仲有作為。
另據知，國務院亦剛發布了「關於支持福建省加快建設海峽西岸經濟區的若干意見」，明確指出要加快現代化基礎設施建設，發揮獨特的對台優勢，努力建立兩岸交流合作的前沿平台。在國策支持，加上市場的憧憬底下，相信有關消息將可再度刺激一眾台灣概念股以及港口股，同樣值得留意。
（小尾）