本文重點
大部分香港人都認識宜家傢俬，但係宜家創辦人坎普拉德（Ingvar Kamprad）喺一般人心目中嘅知名度就唔高，其實呢位瑞士首富曾經超越「股神」巴菲特，坐上全球首富嘅寶座，同宜家做咗好多年代工生意嘅捷豐家居（00776）執行董事梁國賢就話，佢一啲架子都無，甚至早排搭飛機嚟中國睇廠，都只係坐經濟艙咋！
坐經濟艙 謝絕保護
梁國賢話今年82歲嘅坎普拉德雖然已退休無做宜家主席，不過掛名高級顧問嘅佢依然係公司「幕後揸Fit人」，早排仲特登為宜家飛嚟中國開會，呢次去上海只帶咗6位同事，坐嘅都只係經濟艙，就算喺中國坐車，都要揀平嘅車坐。
出名敬業嘅坎普拉德原本開完會就可以返老家，但佢就特登走去捷豐喺浙江嘅廠房視察，仲同公司講要低調行事，要求佢哋唔好通知當地官員及謝絕公安保護，甚至嗰日午飯都只喺廠房嘅飯堂搞掂。不過梁國賢話好似坎普拉德呢啲大人物入境，內地政府又點會唔知，所以其實佢身邊一直有一批國安局人員貼身保護！
余絲韻