本文重點
近排豬流感（H1N1甲型流感）搞到有人怕食豬肉，加上金融海嘯影響下，豬價自去年初至今年累跌三成，令早幾年大舉進軍內地養豬業嘅外資都有啲擔心，外資進軍養豬業雖然令行業競爭白熱化，卻可將養豬業走向現代化。
爭崩頭有利現代化
翻查資料，近年外資喺內地養豬成風，出名嘅除咗美資大行高盛外，喺納斯達克上市嘅艾格非國際早前亦投資成億美元，喺江西、福建、廣西及上海等地建40個豬場；中糧集團計劃喺湖北建立50萬頭母豬養殖場，泰國正大亦與江蘇農墾合作，計劃5年內建立年產100萬頭生豬及屠宰加工能力，一時間大財團個個爭相養豬，競爭激烈。
艾格非總裁熊俊宏坦言，現時豬價下跌，經濟又唔好，佢哋嘅豬場亦面臨壓力，不過佢話雖然現在加入內地養豬業嘅大財團愈來愈多，但中國養豬業不能再倚靠「千家萬戶」式嘅小農模式，走向大規模及科學化模式係必然途徑，否則一盤散沙嘅市場只會更易令豬價暴升暴跌。
余絲韻