本文重點
面對百年一遇嘅金融海嘯，唔少投資者會問計於經濟學家。近排絲絲見到大大小小嘅論壇上，經濟學家頻頻出嚟縱論經濟、把脈市場動態，成為新一代「財星」，但佢哋未為閣下獻計如何「吸金」前，佢哋本身嘅吸金技巧已經嚇人，因為名氣較大嘅學者出席一個論壇閒閒哋要收番十幾廿萬美金，其中「來路貨」嘅出場費較「土炮」更厲害。
諾貝爾經濟學獎得主保羅‧克魯格曼近排去內地3天，由北京、上海到廣州，每日都有演講，有人計過條數，以克魯格曼一場演講加論壇開價19萬美元計，淨係呢3日嘅行程，佢嘅荷包大概已吸納咗近400萬元人民幣。
郎咸平出場費倍升
絲絲聽內地記者朋友講，早前撞到經濟學家郎咸平大師，佢話自己嘅「出場費」已升到15萬人仔，有大把人排住隊等聽佢演講同請佢食飯，實在忙到冇時間回答記者問題。
除咗郎大師身價短短幾個月內升咗成倍外，謝國忠、宋鴻兵等「明星」級經濟學者平時一場演講都要過10萬元。
余絲韻