本文重點
雖說金融海嘯令銀行及金融機構大炒人，不過有危便有機，裁員減薪無損人們入行嘅心志，好似下月舉行嘅特級財務分析師（CFA）考試，全球參加考生就高達12.86萬人，打破晒之前紀錄，再創歷史新高，睇嚟仍有好多人想入行做「Fund佬」！
CFA向來被視為入行做基金經理及分析員嘅基本資格，令到呢個分為3個Level嘅專業考試，近年吸引愈來愈多人應考。CFA協會早兩日仲特地出埋新聞稿，話下月考試有來自154個地區國家嘅考生參加，人數較去年中嗰次嘅11.85萬人仲要多成萬人。
三級考試唔易過關
市場人士話，CFA考試向以難度見稱，好似去年底嘅Level 1考試，全球有近5萬人應考，合格率只有35%，而Level 2及Level 3每年更只於六月舉行一次，考生如果唔好彩喺第二、三級考試「肥佬」，就要等足一年先有機會重考。
協會建議考生每級考試要預留250小時溫習，考生平均要花4年時間及2萬港元完成三級考試。
余絲韻