尋日朝睇到個財經電視節目，個嘉賓啱啱喺度教人利用「黃金交叉」入市買股票，但據我所知，唔係佢講嘅，短期平均線升穿長期平均線就叫做「黃金交叉」，仲要睇兩條平均線點行，如果長嗰條線仲跌緊，短嗰條升穿都唔係「黃金交叉」，而係兩條平均線都要同時上升，「死亡交叉」就啱啱相反。不過算啦，香港股民大部分唔識亦唔着重技術分析，大部分都係打電話攞貼士嗰種，自己唔願去學，揩咗嘢就一句：「我乜都唔識㗎。」去推卸責任。如果信技術分析，見到恒指嘅季度走勢（每棍代表一季），9RSI喺○七年第四季已經升到90，就知道個市跌硬啦。
雖然隻鎊失守1.52，但我反而吼番隻歐元，都好耐冇搞過。不過，我見星期五會公布德、法、意同歐元區首季GDP，而且預期好差，再望番歐元企喺1.36，相對偏高，沽得過，於是喺1.3645沽咗一手，點知即日已經跌穿1.36，於是我喺1.3585平倉，之後喺1.3622再沽番，博今日穿1.35！
蘇小妹