國企指數亦跌近3%，報收9,448點。現貨場成交縮水至636億元，樂觀派話沽壓唔嚴重，魚缸稍作整固，可收復250日線。古勝唔敢太樂觀，亦未太悲觀，但種種迹象顯示，本地魚缸反彈浪暫告一段落，17,600點或行人止步，問題係要回調至邊個水平才獲支持。
港交所「紅底」難保
兩大巨無霸領跌，大笨象（00005）報收62.35元，跟報收73.15元的祖國移動（00941）齊齊跌逾4%。港交所（00388）派首季成績表後，較早前的威勢不復見，雖然管理層有信心第二季業績有改善，但值得留意係衍生工具成交額持續縮水，皆因魚缸上落快兼波幅大，衍生工具自然乏人問津，呢一瓣賺錢生意欠動力，港交所前景堪虞。昨日股價跌逾7%，係表現最曳大隻佬。港交所係魚缸指標，港交所若失去紅底股身份，魚缸跌勢將加劇。
紅色錢莊早段顯著下跌，午後跌勢喘定，建行（00939）完成批盪無工行（01398）咁好彩，批盪後撞正魚缸調整，昨日再跌超過2%，報收4.7元。
騰訊（00700）派成績表，季度業績急升逾九成，股價一度升破80元，並創82元新高，報收79.95元，升幅由12%縮水至9.8%。花旗納指屬眾多指數中，最先出現見頂迹象，騰訊亦算科技股，依家先追未免太遲。
祖國屋仔市場升溫，本地屋仔市場亦陸續有新盤推出，新屋銷情不俗，地主佬之前亦因此炒到甩轆。不過，昨本地地主卻面對龐大沽壓，斑點狗（00101）最多跌逾7%，報收21.8元，跌4%。超人旗艦（00001）跟三兄弟檔口（00016）分別跌5%及3.4%，信置（00083）跟「鄉下佬」（00017）則跌3.3%及2.8%。大魔頭指數季度檢討有結果，建滔化工（00148）跟人和（01387）獲納入新興市場指數，但前者跟魚缸插水，跌7%，後者則逆市上升3.6%。
推動內需有利經營
中國旺旺（00151）已返回寶島魚缸發行預託證券（TDR），而兩岸概念近日炙手可熱，昨日旺旺逆市靠穩。雖然全球經濟仍存隱憂，但祖國仍是全球經濟增長率最高國家，旺旺在祖國市場早已站穩腳。集團去年營業收入逾15.5億美元，年增長率達42%，稅後純利2.63億美元，年增長超過三成。
旺旺表示，即使經濟面臨不景氣，但旺旺的資本支出仍將達1億美元，趁成本較低的時候，擴張業務。旺旺今年投資重點包括乳品、米果及休閒食品等事業部，尤其將強化地方上的物流倉庫及生產線的擴建。北大人既已投放巨額資金救市，推動內需，有利旺旺消費業務的經營環境，相信今年經營表現可再次跑贏同業。旺旺在50日平均線，即3.58元支持力強，短期整固料已完成。
古勝