本文重點
經濟唔好，公司生意轉差，畀客拖數好正常，舊年因美國客戶執笠而要撥備嘅利豐（00494），其董事總經理馮國綸卻「唱反調」，話經濟好嗰陣，客人會拖數，反而家陣個市唔好，客人唔敢拖數，費事畀人話佢哋唔掂。
拖數會畀人話唔掂
有唔少廠佬話依家經濟差，成日驚被人拖數，一見個客勢色唔對，寧願唔接定單。美國市場風高浪急，申請破產保護令同破產嘅公司成街都係，而利豐有唔少美國客，舊年佢哋有個客仔就唔好彩執咗笠，搞到利豐要為此作撥備，又話唔排除今年再有其他公司執笠，咁馮生怕唔怕有人拖數呢？又有甚麼方法追數？
馮生就笑笑口話唔怕，因為市唔好先至無人拖數。何解？因為個市差時，啲客怕一拖數就會被人懷疑佢係咪「唔掂」，咁又係，做生意嘅嘢，唔好因小失大嘛。
余絲韻