著名對沖基金經理索羅斯早兩日出席專門幫助紐約市失業及貧窮問題嘅慈善團體Robin Hood（羅賓漢基金）春季籌款晚會，承諾捐出5,000萬美元畀基金，以提供食品及地方予有需要人士，但前提係對方未來兩年內每年要籌集相同金額款項，即係羅賓漢基金嚟緊兩年要搵成億美元，索羅斯筆錢先有着落。
羅賓漢基金呢個一年一度嘅籌款晚會，過往多向華爾街嘅基金大戶及大孖沙埋手，透過競投例如與出名大廚Mario Batali共進晚餐，又或飛往澳洲同「狼人」Hugh Jackman食晏等活動，籌集金錢助慈善。不過金融海嘯令一切成為過去，今年晚會返璞歸真，不再以明星、拍賣為主打，只邀請索羅斯做特別嘉賓，索羅斯講笑咁話，今次行動係要激發善長及慈善團體嘅捐錢決心，以籌得更多善款，配合因經濟差而導致食物及住屋嘅需求急升。
余絲韻