本文重點
香港年中都有唔少模擬投資比賽畀投資者一展身手，最近大福證券、內地21CN網站及清華大學學生理財協會就舉辦咗個「港股權證/牛熊證仿真投資大賽」，尋日喺深圳舉行頒獎典禮，絲絲亦有去同優勝者做訪問，問吓佢哋有乜致勝心得。
同以往啲比賽唔同，今次參賽者嚟自中港兩地，加埋有6,000人參加。結果公開組全部都係香港人贏，而學生組三甲就清一色係內地生，係咪代表內地生依家對港股的投入同埋熟悉程度比香港大學生更犀利？
炒恒指Call輪致勝
○七年以在港內地生身份勝出香港大學生模擬投資比賽嘅少女股神王雅媛話，內地生大部分都有留意港股，但有買開嘅只屬少數，要炒都會炒A股先。絲絲同學生組冠軍姚成龍傾開，原來佢已有3年A股實戰經驗，至於港股就靠今次比賽首次接觸。比賽由三月中到四月中舉行，期間港股升咗唔少，兩組冠軍都係靠不斷買恒指Call輪致勝。姚成龍話咁做係因為唔熟悉港股，公開組冠軍卜彥釗就專揀高槓桿、低引伸波幅嘅窩輪，佢哋分別將投資本金由50萬滾大到234萬及327萬。
余絲韻