外圍股市表現回勇，港股午後一度在內地股市上升帶動下，重越17,300水平，不過淡友展開反擊，期指跌穿萬七點，拖累恒指回落，報收17,059點，跌94點。古晨相信周一港股已短期見頂，即使暫未有利淡消息拖累大市急挫，但好友已乏力再進攻。不過股仔繼續熱炒，古晨一於少理，炒得一日得一日，最緊要識執生。
今日揀隻細細粒神仙股，福邦控股（01041）昨日升逾兩成，交投亦見活躍，屬熱炒股仔。福邦去年開始轉型，除原有木材業務外，亦開拓海產業務。由於集團大股東張氏家族，在福建擁有龐大業務網絡，在地理位置上，福邦佔有一定優勢，其海產業務在兩岸「三通」後，更可擴展至台灣，前景值得睇高一線。三通概念股呢個幾兩個星期炒到㷫合合，福邦之前炒上2.2仙後進行整固，昨日再現升勢，仍有條件追落後。現價買入博升穿3仙，跌穿1.7仙止蝕。
古晨