前日喺1.5288沽咗一手鎊，諗住等英國星期三公布就業數據，跌番去1.5150先揸過。點知英國個就業數據無啦啦喺星期二晚公布，原因係有啲數據意外提前知道，所以就提早公布咁話。又係嘅，如果所需數據齊晒，都照原定時間公布就業數據，由於個申領失業救濟金人數少過預期，一旦走漏風聲，我睇隻鎊實會挾到飛起，但一般散戶仲唔知發生咩事，對投資者造成不公平。
隻鎊尋日咁樣一挾，又唔知有幾多人坐艇，全日由低位差唔多挾高300點，坐得穩已經算好彩。姊妹Ivy雖然有能力沿途一路逆市沽，但都話沽到有啲驚，所以中途都有獲利離場。我自己嗰手淡倉就喺1.51三十幾止賺。
尋日朝八點零鐘，隻鎊又上番1.53，可能隻鎊星期二急升，搞到我都唔敢沽，結果隻鎊由1.53廿幾跌到1.5280。下晝見佢上番1.53邊，決定沽番，之後英倫銀行公布通脹報告，話二○一二年前通脹都唔會上番目標水平，又話今年餘下時間，GDP按年都係收縮，隻鎊急跌，我喺1.52邊止賺。之後隻鎊穿埋1.52，我決定觀望吓先，但都係以沽為主。
蘇小妹