本地魚缸亦重新振作，下半場在祖國魚缸做好帶動下，曾重越250日線水平，高見17,372點。不過，兩件重量級大笨象（00005）跟建行（00939）表現不濟，加上祖國移動（00941）高掛免戰牌，少咗個巨無霸坐鎮，期貨場淡友乘機發難，在祖國魚缸散場後，踩冧期貨場，拖埋現貨場落水。恒指一度低見17,014點，死守萬七關，報收17,059點，跌94點；國企指數力保不失，在一眾紅色地主及石油股力撐下，國指仍錄得16點升幅，報收9,738點。
建行有質素可長揸
現貨場成交額激增至1,466億元，撇除建行批盪上板貨，又少咗祖國移動休戰貢獻幾十億，一加一減之下，實際成交額都係七百幾億，跟周二變動唔大。呢排成交確有增加，但上一季本地魚缸死氣沉沉，港交所（00388）首季純利大跌近五成，亦唔派季度股息，其股價午後升幅收窄，報收109.8元。在下則認為港交所現價偏高，加上下半年魚缸有冇咁好景，古勝烏卜卜，相信近日股價強勢，不過係期貨炒鬼利用其貨疏特點，挾高指數。
美銀成功減持建行H股套現，昨日再有逾5.8億美元批盪貨透過「瑞士佬」掟出街，批盪價分別為4.88元及4.82元，缸湖傳聞話係昨日有份接美銀手貨的芬佬，咁樣一入一出，帳面即贏超過一成。可憐昨日接二輪批盪的投資者，以昨日建行散場價4.79元計算，即時「坐艇」。其他紅色金融股亦唔精神，不過，古勝睇好建行前景，逢低吸納長線持有梗有着數。
「油魔」又有動作，油價回升，帶動中石油（00857）、中海油（00883）同中石化（00386）逆市上升，升幅由1.9%至5.4%不等。「油魔」跟「金童子」雖然唔係兄弟，但好多時候共同進退，尤其係各地魚缸累積巨大升幅，開始有資金流入金市避險，刺激金礦股上升。「油魔」會唔會再作惡，在下唔敢胡亂猜測，不過各國政府均鼓勵發展可再生能源及清潔能源，包括祖國政府，亦推動企業積極研發環保能源工作。
新能源成未來主流
北大人近期積極推動環保能源及再生能源，光大國際（00257）的管理層亦表示，在政府推出新能源優惠政策後，預料公司旗下的環保能源項目均能受惠。光國未來更會增加科研方面的資金投入，推動公司朝向「新能源、高科技」方面轉型。祖國政府全力扶持新能源發展，陸續推出優惠政策，包括新能源發電的價格調整及稅收優惠，預料光國的環保能源項目，如垃圾沼氣發電及風力發電業務皆可受惠。光國的環保業務已進入高速發展期，長遠前景看俏。
古勝