連升多個交易日後，港股尋日終於掉頭向下。當中建行（00939）更加單日下挫逾6%，理由唔知係咪受傳聞淡馬錫無意接美銀手貨的消息影響，抑或係內地四月份新增貸款只達6,000億元，少於市場早前預期所影響，但講到尾，一眾股份以及恒指升咗咁耐，出現回吐都好正常。
其實唔單止大藍籌，就連部分金屬資源股尋日都見回吐，即使國務院頒布有關有色金屬產業及物流業調整的振興規劃，由於早前已累積一定升幅，中國鋁業（02600）、新鑫礦業（03833）以及湖南有色（02626）都分別錄得較大的跌幅。
不過，市場有跌亦有升，受惠於中港最新簽署CEPA補充協議中，中央承諾積極研究在內地引入類似港股ETF，一眾中港兩地證券股都被炒上。之但係國家今次再出口術，呢招其實已用過多次，加上今次大市又累積一定升幅，相信消息持久力麻麻，實在不宜高追。
（小尾）