本文重點
雖然近日豬流感（H1N1甲型流感）肆虐，但對曾應對過「沙士」嘅恒隆地產（00101）執行董事吳士元嚟講，只係「小兒科」，佢仲按原定計劃出發往澳洲做路演，佢笑言唔知去到會唔會畀人隔離。今次豬流感又令佢回想起當年為應付淘大花園沙士事件，日日要走去淘大商場，好彩佢同商場啲員工都無中招，諗起都執番身彩。
滬商場慳電獲退稅
佢講笑話老婆當日叫佢每日去完淘大，最好搵地方沖過涼先好返屋企，佢笑說「乜咁益我呀！」不過呢啲都係苦中作樂，當時淘大疫情嚴重，佢邊有時間去搵地方沖涼吖，最後為怕傳染家人，佢老婆就帶同兩個女去黃金海岸住咗3個月。
講開今次金融海嘯，吳士元話上海徐匯區政府認真唔話得，為鼓勵內地消費，專登攞咗3架名車及30條金條畀港匯廣場嘅消費客人抽獎，另外為鼓勵環保，去年底恒隆地產喺上海嘅商場節省咗106萬元人民幣嘅電費，市政府全數當退稅退還畀公司。絲絲聽後都覺得上海政府反應果真敏捷，反觀港府就真係差一截。
余絲韻