本文重點
富昌證券總經理藺常念一向熱衷籃球比賽，搞咗幾年「金融精英盃」，約埋一班業內好友打比賽，最新一屆係由恒生（00011）籃球隊贏咗冠軍。藺Sir作為金融盃嘅搞手，仲搵埋深圳證監局打友誼賽，搞咗個「深港金融界籃球友誼賽」，仲有特步國際（01368）做贊助。
深證監搞籃球賽再戰
恒生籃球隊相當有實力，藺Sir同絲絲講，呢場波簡直可用談笑用兵嚟形容，最終比賽結果係65比25，恒生籃球隊大勝40分。深圳證監局經此一敗，話會自己搞一個深圳金融界嘅籃球比賽，冠軍隊將會捲土重來，與香港金融盃嘅新一屆冠軍，喺今年十月再分高下。
講起下一屆嘅香港金融盃，將會喺今年八月舉行，相信喺九月就知冠軍誰屬。
藺Sir笑言今次冠軍未必再係恒生隊，絲絲相當認同，因為睇番今年二月嘅比賽，有藺Sir擔任隊長嘅「狂牛隊」，當時只係僅以一分之微，以40比41被恒生隊擊敗，相信經過呢幾個月嘅操練，「狂牛隊」大有機會問鼎冠軍，屆時又會出現一番龍爭虎鬥。
余絲韻