尋日東京開市後，發覺啲外幣走勢好唔一致，甚至可以話都幾亂。好似隻歐元就強，英鎊就弱，而澳、紐元同隻YEN都強，你話隻YEN喺交叉盤度跌咩，又唔係吖。至於歐元強、英鎊弱就明顯係同歐鎊交叉盤挾番上去有關。
梗係啦，早排受到歐洲央行減息，同可能實行量化寬鬆貨幣政策影響，一路畀啲沽盤㩒住隻歐元，結果歐洲都係減0.25厘，而所謂嘅量化寬鬆貨幣政策，涉及嘅金額唔多，所以消息一出，隻歐元就係咁挾上去。不過，歐洲央行又暗示可能會再減息，雖然上星期五隻歐元都挾到上去1.36收市，但尋日衝多些少就回番落去。
尋日朝原本諗住吼位揸番隻鎊，但起身見最高都係做1.5242，而且已經落番去1.52十幾廿幾，仲穿過1.52，所以決定望多陣先。之後見佢彈過幾次都只係上到三、四十，後來見個高位做1.5245，唔似會再升，反而似係見咗頂，所以先至喺1.5222沽咗一手，下晝見佢突然急跌到七十幾，於是平倉先。尋日各地都冇咩數據，應該會幾靜，都係睇位短炒算嘞。
蘇小妹