港交所熊仔渴市
藍色大隻佬普遍下跌，大笨象（00005）曾逼近70元，高69.4元，散場報收66.1元，升幅收窄至只有0.3%，總算力保不失。祖國移動（00941）報收75.3元，倒跌1.2%，另一指數權重股港交所（00388），穿頭破腳好難睇，盤中高見125.7元，報收116.2元，倒跌2.1元或1.7%，連升多個交易日後，首次大成交下跌，走勢唔多老利，怕且已見頂。不過，港交所累積升幅甚巨，但熊仔買少見少，養熊戶被殺至體無完膚，最慘係未有新熊仔登場，養熊戶無仇報。
美銀需要集資，除向市場抽水，沽售建行（00939）套現最直接。缸湖傳聞曾向獅城淡馬錫招手，無奈美銀未肯賤價沽貨，而買家則要求愈平愈好，雙方談不攏，建行沽壓重重，股價低見4.86元，報收4.9元，跌6.6%。其他紅色金融股亦腳軟，不過染藍落空的招行（03968），卻因為旗下永隆可望今年扭虧為盈，股價逆市升1.7%。
大波鞋（00551）被踢出成分股，換入新貴華潤電力（00836），成分股最後一個工業股代表被踢走，見證香江完全脫離工業呢一瓣。香江工業早於八十年代開始北移，祖國更成為世界工廠，要數在本地魚缸上市的工業股，十居其九係祖國企業。
現價買風險有限
創維數碼（00751）昨日逆市升4.8%，算係為工業股爭番口氣。較早前股仔開始落鑊，創維股價卻原封不動，上月底公布營運數據，截至三月底止的全年電視銷量，同比升9%至915.2萬台，其中出口表現最佳，升46%至289萬台，佔總銷貨量三成一。單睇三月份銷貨表現，內銷電視數量同比跌31%，跌幅比一月的27%大，管理層解釋，年初熱炒的「家電下鄉」措施還在初期階段。
創維另一特點係持有現金23.8億元，所以在目前的經濟環境中，係少數可以維持高派息的工業股，預測今年公司賺3億左右，市盈率不過6倍，即係話現價估值唔高，在魚缸累積巨大升幅後，呢類估值偏低股份，自然被發掘，昨日走勢始見突破，現價追入風險亦有限。
古勝